Psalmus 8.

De Christi magnificentia et exaltatione.

 

Dómine Dóminus noster, * quam admirábile est nomen tuum in univérsa terra !

 

Quóniam eleváta est magnificéntia tua, * super cœlos.

 

Ex ore infántium et lacténtium perfecísti laudem propter inimícos tuos, * ut déstruas inimícum et ultórem.

 

Quóniam vidébo cœlos tuos, ópera digitórum tuórum : * lunam et stellas, quæ tu fundásti.

 

Quid est homo, quod memor es ejus ? * aut fílius hóminis, quóniam vísitas eum ?

 

Minuísti eum paulóminus ab Angelis, † glória et honóre coronásti eum : * et constituísti eum super ópera mánuum tuárum.

 

Omnia subjecísti sub pédibus ejus, † oves et boves univérsas : * ínsuper et pécora campi.

 

Vólucres cœli, et pisces maris, * qui perámbulant sémitas maris.

 

Dómine Dóminus noster, * quam admirábile est nomen tuum in univérsa terra !